MEAT OF ORIGIN KAROO NPC
(Nr 2012/078056/08)
Nuusbrief #4/2017
In hierdie – die vierde en laaste - nuusbrief van 2017 verskaf ons ‘n paar interessante brokkies nuus waarmee lede van die “Karoo Meat of Origin” Sertifisering skema gedurende die komende somervakansie periode langs die braaivleisvure en op die strande kan ‘brag’. As almal moeg gesels is oor die politiek, Zimbabwe en Deon Meyer se nuutste boek, kan die feite in hierdie nuusbrief help om nuwe onderwerpe vir bespreking te stimuleer, soos: Waar kan ek ‘gesertifiseerde egte’ Karoo Lam koop? en hoe baie geld maak Karoo boere nou as gevolg van die hoër prys wat hulle vir Karoo Lam ontvang. Ons verskaf ook terugvoering oor die belangrikste besluite geneem by die onlangse MOOK jaarvergadering.
Prof Johann Kirsten was bevoorreg om onlangs ‘n vergadering oor Geografiese Indikators (GI) van die Europese Unie in Kaapstad by te woon waar ander Europese voorbeelde van GIs bespreek is. Die verteenwoordigers van die Consorzio Tutela Mozzarella di Bufala Campana DOP – die konsortium van produsente van die bekende Mozzarella - het saam met Karoo Lam ‘n aanbieding gedoen. Hulle hoofkwartier en administratiewe kantore is in ‘n pragtige ou kasteel in die Campana distrik van Italië gesetel. Hoe word dit befonds? Blykbaar alles uit heffings van produsente en verwerkers en op die manier kan hulle ook bemarking en standaard verpakking befonds. Blykbaar is daar geen staatshulp vir die organisasie nie en boere moet selfs addisionele vir kwaliteit oudits betaal. So MOOK is op die regte pad – ons moet net die volumes op stoot en sorg dat alle skaap en lam uit die Karoo onder die KMOO merk bemark word!
Aktiwiteite om bewusmaking onder verbruikers te bevorder
Lede van MOOK vra met reg wat ons doen om Karoo Lam as unieke produk te bevorder. In lyn met besluite van die Direksie en die Algemene Jaarvergadering is die volgende stappe geneem om waardering van die produk onder verbruikers en sjefs te bevorder:
1. 5000 afskrifte van ons mooi brosjures is herdruk
2. Die finale seremonie van die One&Only Reaching for Young Stars kompetisie
onder die top sjef skole in die Kaap is gehou op Vrydag 10 November by die
One&Only. Tydens die kompetisie moes die aspirant sjefs leer om op kreatiewe
wyse met Karoo Lam te kook en die wenresep van Karoo Lam is dan ook deur
Chris Mare (sjef van die One&Only ) tydens die seremonie aan die 120
uitgelese gaste bedien. Die wen paar het ‘n naweek gewen in
Stuurmansfontein se korbeel huis. Dankie aan Charmaine en Piet Botha vir die
skenking. Ryan Boon Speciality Meats het wonderlik saam gewerk om die vleis
vir die geleentheid te voorsien.
3. Danksy ‘n skenking van MOOK in samewerking met Williston Vleiskoöperasie en
Ryan Boon was gesertifiseerde Karoo Lam weer die hoofgereg tydens die Eat
Out Awards seremonie in die Kaap op 19 November waar die top 20
restaurante in Suid-Afrika aangekondig is.
Waar is ‘gesertifiseerde’ Karoo Lam beskikbaar? Hier is die antwoorde.
Die volgende kleinhandelaars koop op gereelde basis gesertifiseerde karkasse van die twee gesertifiseerde abattoirs aan. Verwys gerus vriende, kennisse en familie na hierdie ondernemings indien hulle navraag doen oor plekke waar Karoo lam gekoop kan word.
Gauteng
| Naam van slaghuis/winkel | Adres | Kontak besonderhede |
| Braeside Butchery | 20 Gleneagles Road Greenside, Randburg | 011 788 3613 |
| Boma Meat Market | H/v Garsfontein & Rubenstein Rylaan Moreleta Park Pretoria | 012 998 8711 |
| Forsmay Muslim Butchery | 24 Crown Rd, Fordsburg, Johannesburg | 011 838 5720 |
| Boskruin Butchery | Summerfields Shopping Centre, shop 27, Boskruin, Gauteng | |
| Khans Meat/ Famzahr Meat enterprise | H/v 3rd Ave, Queens Rd, Mayfair, Johannesburg | 011-837 4742 |
| Bull and Bush (Pty) Ltd meat Merchants | Unit 21, 7 on Mastiff Drive, Linbro Bussiness park, Sandton | 011 – 454 8274 | 011 – 454 8116 |
| Jacksons REAL Food Market | 300 Bryanston Drive Bryanston En Kyalami Corner (H/v Main en R55) Kyalami | 011-463 1598 |
Wes-Kaap
| Ryan Boon Speciality Meats | Groothandel Noorder Paarl, Paarl En De Warenmarkt 20 Ryneveldstraat Stellenbosch | Groothandel: 021-8721975 Winkel: 021-887 9905 |
| Plattekloof Spar | H/v Olienhout & Plattekloof Straat, Plattekloof 3, Kaapstad | 021 911 1010 |
| Frankie Fenner Meat Merchants | 183 Sir Lowry Road, Woodstock en Winkel 20B, Gardens Centre H/v Buitenkant and Mill Street Kaapstad | 021 461 0206 |
| Seepunt Spar | Regent Road, Seepunt, Kaapstad | 021-439- 0913 |
| Houtbaai Spar | 46 Victoria Street Houtbaai 7800 | 021-7902683 |
| Son of a Butcher | 2 Upper Holly street, Nuweland | 082 307 9985 |
Kwazulu-Natal
| Hope Meats | 17A Mackeurtan Ave, Durban Noord | 031 563 1201 |
Noord-Kaap
| Karusaf | Lutzstraat Williston | 053 391 3002 |
| Top Tjops | Industriële gebied Carnarvon | 053 382 3665 |
Belangrikste besluite geneem by die Algemene Jaarvergadering: Carnarvon, Vrydag 6 Oktober 2017
Die vergadering het die finansiële state vir 2016/17 goedgekeur en kennis geneem dat die jaar met surplusfondse afgesluit is. Dit is ‘n groot verbetering op die 2015/16 verslag wat ‘n tekort aangetoon het.
Die begroting van 2017/2018 is ook deur die vergadering goedgekeur. Voortvloeiend uit die 2017/18 begroting is die ledegelde vir 2018 vasgestel. Die nuwe ledegelde is as volg:
| Lid | 2017 ledegeld | Nuwe ledegelde vir 2018 | % verhoging |
| Produsente | 17c/ingeskrewe ha | 18c/ingeskrewe ha | 5,8% |
| Kleinhandelaars | R1000/winkel | R1100/winkel | 10% |
Rekeninge vir ledegelde vir 2018 sal in Februarie 2018 aan alle lede uitgestuur word vir betaling voor 15 Maart 2018.
Die vergadering het ook die aanstelling van GBG ouditeure van Cradock as MOOK se ouditeure goedgekeur.
Die samestelling van die Direksie is ook weer bevestig met geen nuwe nominasies en geen bedankings nie.
Verkope van Karoo lam
Die aantal karkasse wat as gesertifiseerde Karoo lam verkoop word, het ten spyte van die redelik droë toestande in die Karoo, gedurende die laaste kwartaal dramaties gestyg. Waar daar vroeër in die jaar in die orde van 800-900 karkasse per maand verkoop is, is ‘n rekord totaal van 1 300 gesertifiseerde karkasse in Oktobermaand aan geregistreerde kleinhandelaars verkoop. Vir die 10 maande tot en met die einde van Oktober 2017 is 10 179 Karoo lammers by boere aangekoop en aan die verskillende kleinhandelaars verkoop. In ag genome die gemiddelde premie vir Karoo lam bo die markprys vir gewone lam kan ‘n mens argumenteer dat die 120 geregistreerde MOOK produsente teen die einde van 2017 naby aan R1 miljoen ekstra sal verdien deur aan die sertifisering skema te behoort. Dit is ‘n groot opbrengs op die totale produsente ledegelde van sowat R130 000.
Karoo Meat of Origin klere
Albertus Erasmus het baie moeite gedoen om gholf hempies en pette met die KMOO logo te ontwerp. Sien die voorbeelde hiernaas.
Enige iemand wat belangstel om van die klere te bestel kan gerus met Albertus kontak maak by: AE@eproc.ac.za.
Vir lede se gerief het Albertus ook ‘n bestelvorm saamgestel wat gebruik kan word om bestellings te plaas. Dit word as aparte dokument in die epos aan lede gestuur.
Afsluiting
Ten slotte wil die Direksie weereens alle lede bedank vir hul getroue ondersteuning en bydrae om MOOK en die meegaande sertifisering skema ‘n sukses te maak. As ons hierop kan voort bou sal ons binnekort al die Karoo abattoirs en produsente in een organisasie verenig kry.
Dan is dit ook ons wens dat almal ‘n geseënde feestyd en ‘n voorspoedige nuwe jaar sal geniet.
Vriendelike groete
Johann Kirsten
29 November 2017